BUTUAN CITY – Nanawagan ang Independent Commission for Infrastructure (ICI) sa tanang adunay kahibalo kabahin sa mga proyekto sa flood control nga makigtambayayong sa ilang imbestigasyon human ang mga batikos nga hangtod karon, wala pa’y napasakaan og kaso nga dagkong opisyales.
Matod ni ICC Chairperson Andres Reyes Jr., nanginahanglan sila og mga testigo ug impormasyon aron mapalig-on pa ang ilang kaso. Bisan pa man og adunay ilang nakitang koneksyon tali sa mga opisyal sa Department of Public Works and Highways (DPWH) ug sa mga proponents niining kongresista nga nalambigit sa mga proyekto sa flood control, wala pa sila’y lig-on nga ebidensya nga makapamatood sa mga alegasyon.
Giklaro usab niya nga abri ang ilang komisyon alang sa kanhi kongresista nga si Zaldy Co, bisan pa man og pila na kini ka higayon nga wala mitambong sa mga pagdungog ug adunay subpoena.
Gipasabot ni Reyes nga bisan og nasangpit na ang ngalan ni Co sa mga kasong gisumite sa Office of the Ombudsman, ang ilang referral gibase sa matag kaso, busa posible gihapon nga siya pangutan-on ug imbestigahon sa laing mga kaso.
Gisiguro usab ni Reyes nga ilang susihon ang posibleng mga anomalya sa mga proyekto sa flood control sa Cebu human sa kadaot nga gidala sa bagyong Tino. K
ini human gipadayag ni Cebu Governor Pamela Balicuatro nga bisan pa man og adunay nakagahin nga P26 bilyon nga pondo alang sa mga flood control projects sa probinsya, nabahaan gihapon ang daghang lugar sa paghapak sa maong bagyo.
Kini nga sitwasyon nagduso sa komisyon nga masusi pa ang implementasyon ug paggamit sa pondo aron masuta kung adunay kakulangan o kalapasan sa mga proyekto.
