BUTUAN CITY – Nagtuo ang civil society group nga Bangon Sambayanan nga sumpa ug delubyo alang sa katawhang Filipino ang pagkatudlo ni Justice Secretary Jesus Crispin Remulla isip bag-ong Ombudsman.
Sumala ni Jeffrey ‘Ka Eric’ Celiz, Secretary General sa nasangpit nga grupo, kinahanglang dunay delicadeza ug intigridad ang usa ka Ombudsman.
Apan sa kaso matud pa ni Remulla, makita nga nawala ang maong mga tamdanan sa pagkapili niya sa maong posisyon, ilabina nga dili ikalimud nga gitabangan niini ang iyang anak sa pagpa-dismiss sa kaso niini human nasakpang nagpalusot og high grade kush o marijuana.
Gipasanginlan usab ni Celiz si Remulla nga usa sa mga nagmainubra sa pagdakop kang kanhi Pangulong Rodrigo Duterte.
Gawas pa, wala usab matud pay integridad ang maong opisyal tungod kay politiko man ang motibo sa pagkatudlo niini sukwahi sa gipangitang Ombudsman.
Nagtuo usab si Celiz nga unang himoon ni Remulla ang pag protekta nila Pangulong Ferdinand BongBong Marcos ingon man ni kanhi House Speaker Martin Romualdez nga iyang mga barkada.
