BUTUAN CITY – Tulo ka mga abogado ang pursigidong mupasaka og reklamo karong adlawa ngadto sa Senado batuk kang Senador Risa Hontiveros tungod sa iya matud pang “disorderly behavior.”
Sila Attorneys Manuelito Luna, Jacinto Paras, ug Ferdinand Topacio, magduso og reklamo aron imbestigahan sa Senado si Hontiveros kalabot sa pag-atras sa testimonya ni Michael Maurillo niadtong Hulyo, kinsa unang mibarog sa Senate inquiry niadtong 2024 nga gipangunahan ni Hontiveros.
Si Atty Paras, kanhi kongresista sa Negros Oriental ug presidential adviser on political affairs ubos sa administrasyon ni Duterte, samtang si Topacio, mao karon ang deputy spokesman sa Partido Demokratiko Pilipino (PDP), nga suod nga alyado sa mga Duterte.
Madumdumang si Maurillo atol sa maong pagdungog, midaut nila Kingdom of Jesus Christ kon KOJC founder Pastor Apollo Quiboloy, kanhi Pangulong Rodrigo Duterte ug Vice President Sara Duterte.
Apan niadtong Hunyo, usa ka online video ang mikatag nga nagpakita kang Maurillo ug nag-akusa sa senadora nga nagsuhol matud pa kaniya og P1 milyon aron pasanginlan si Quiboloy, nga nalambigit sa giingong mga abuso nga nahitabo sa compound sa KJOC sa Davao City ug sa SMNI Network.
Gani giyagyag pa ni Maurillo nga gisugo siya se senadora nga apilon sa kaso ang kanhi presidente ug si Bise Presidente Duterte, kansa makonsidera matud pa nga “disorderly behavior” ubos sa Article VI, Section 16(3) sa Konstitusyon.
Gidugang pa sa maong mga abogado nga kanunay na matud pang nagpresenta si Hontiveros og mga testigo sa mga Senate inquiries nga sa ngadto-ngadto, mubakwi ra usab sa ilang testimonya ug mopahayag nga gibayran sila ni Hontiveros.
Aduna matud pa’y pattern sa pagpamakak nga gihimo ma sa senadora sa mi-aging mga Senate inquiries sa ubang mga isyu.
Kampante ang mga abogado nga mupahamtang ang Senado og tukmang silot, sama sa expulsion, suspension hangtod sa unom ka bulan, o censure, human unya sa imbestigasyon.
