BUTUAN CITY -Napamatud-an sa gihimong ocular inspection sa bukirang bahin sa Brgy. Puting Bato, sa Cabadbaran City, lalawigan sa Agusan del Norte, nga tinuod ang gisumbong dinhi sa Bombo Radyo sa barangay tanod nga si Rafael Buhawe Jr., nga padayon ang ilegal nga pagpamutol og kahoy’ng Lawaan.
Gibutyag ni Buhawe nga ang maong inspeksyon, gi-ubanan sa abogado sa Department of Environment and Natural Resources kon DENR, Philippine National Police kon PNP ug sa ilang local government.
Sigon ni Buhawe, nakita sa inspeksyon nga tinuod ang iyang alegasyon nga nagkutay sa maong ilegal nga binuhatan ngadto sa duha ka empleyado sa DENR nga sila Puting Bato Enforcement Chief Engr. Albin Rey Indig ug si Arcie Ilano.
Dugang pa ni Buhawe, magpa-abot na lang sila sa resulta sa gipahigayong joint investigation sa DENR-Region Caraga ug PNP.
Sa gihimong inspeksyon, nakita gayod nga layo ra sa kamatuoran ang gipasi-atab sa mga DENR employees nga na-igo kini sa pangalsada o agihanan.
Kahinumduman nga mipasaka og formal complaint si Buhawe sa DENR Regional Office kalabot niini.
