BUTUAN CITY – Gisugyot ni Senador JV Ejercito nga mas ideal alang kang Department of Public Works and Highways kon DPWH Secretary Manny Bonoan nga mag-leave of absence una siya samtang gi-imbestigahan ang kontrobersyal nga mga flood-control projects sa ilang ahensya kansa nagkutay ngadto sa mga gibansangang cong-tractors kon mga kongresistang contractors.
Sa iyang pag-atubang sa mga tigbalita, gipadayag sa senador nga mas maayong himuon kini sa kalihim aron gawasnong makalihok ang imbestigasyon ug malikayan ang posibleng pag-impluwensya niya sa mga tawo sa iyang gipangunahang ahensya.
Bisan matud pa og gusto ni Sec Bonoan nga magbilin og maayong legasiya sa iyang kadumalahan, apan nasayod ang tanan nga ang mga anaa sa DPWH gikan sa mga assistant secretaries, undersecretaries, mga regional directors ug uban pa, maoy nalambigit sa kurapsyon sa mga proyekto sa gobyerno.
Sugyot pa sa Senador, mas maayo usab ang kanunay nga ilahugay ang mga empleyado ug mga opisyal sa nasangpit nga ahensya aron dili sila makuptan sa mga pulitiko nga sama kanila.
Gidugang pa sa senador, kung ang ahensya nag-atubang og daghang mga isyu, natural lang nga ang mga kadagkuan mag-leave of absence kung duna’y himuong imbestigasyon ug anaa na karon kang Bonoan ug kang Pangulong Ferdinand Marcos Jr ang pagdesisyon kalabot niini.
Sa hisgutanan usab nga posibleng ihulip kang Bonoan, wala’y nakita ang senador nga temporaryong mudumala sa ahensya ilabina nga ang mga nagsunod kaniya tungod kay wala may masaligan sa mga nagsunod sa iyang posisyon.
