BUTUAN CITY – Gisugdan karong adlawa ang lima ka adlaw nga ‘Agusan River Cruise’ kondiin gisubay sa duha ka mga pump boats ang Agusan River isip kabahin sa usa ka buwang pagsa-ulog sa Adlaw Hong Butuan.
Gipasabot ni cruise coordinator Merry Jane Tutaan nga tumong niini mao ang pagbalik-lantaw sa paagi sa pagpakabuhi sa atong mga katigulangan nga maoy himuong basehan alang sa pagpalambo pa ning siyudad padulong ngadto sa gitinguha niining mahimong smart city.
Dugang pa ni Tutaan, dili matud pa mahimong mulambo ang siyudad nga dili i-apil ang abundang kasaysayan sa ingon mabati sa tanan ang heritage, kultura ug paagi sa pagpakabuhi sa mga katigulangang Butuanon ug dili makalimtan.
Kaganina mipadulong sila sa Brgy Pagatpatan diin masaksihan ang karaang paagi sa pagpangisda nga inanay na matud pang nawala.
Wala matud pa’y angayang kabalak-an tungod kay fully secured ang gibana-banang 50 ka mga tawong mu-uban sa paglawig tungod sa presensya sa taga-Philippine Coast Guard ug duna usa’y life vest nga gigamit ang matag-usa.
Nasayrang aron mas masilsil ang kultura sa mga orihinal nga Butuanon, duna’y mga kalihukang nakahan-ay sama sa Butuanon language development uban sa nagkada-iyang kalingawan ilabina matag-Sabado sa gabii nga hinuon sa Guingona Park.
