BUTUAN CITY – Wala musalir ang dalang kutsilyo sa usa ka dalaga human niini gisulayan og hold-up og usa ka taxi driver ning mi-aging gabii.
Base sa imbestigasyon sa kapulisan sa Davao City, ang 19-anyos nga suspetsadong gi-ila lang sa alyas Jaysa, residente sa Sto. Nino, Brgy. Marapangi, Toril sa maong siyudad, misakay sa taksi nga gimanihuan sa 45-anyos nga driver nga residente sa Bucana, Brgy.76-A sa susamang syudad gikan sa Toril terminal.
Nagpahatod kini sa Southern Philippines Medical Center, apan pag-abot nila sa San Gabriel St., Dumanlas, Barangay Buhangin mideklara kini og hold-up gamit ang kutsilyo nga giti-on sa hawak sa drayber.
Dali kining nasagang sa drayber ug nagunitan ang iyang kamot rason nga daling nagpakitabang ang drayber sa mga tawo nga anaa sa palibot.
Narekober sa mga otoridad ang gigamit nga kutsilyo sa suspetsado kinsa nagtingkagol na sa Buhangin PNP samtang gihulat ang hingpit nga pagpasaka og kaso batuk kaniya.
