BUTUAN CITY – Padayon karun ang gihimong makuting imbestigasyon sa Claver Municipal Police Station aron mahatagan og hustisya ang kamatayon sa usa ka lalaking Certified Public Accountant kon CPA nga nakit-an nalang ang patay’ng lawas nga gilabay sa pangpang nga bahin sa Sitio Panyog, Brgy. Cagdianao, Claver, Surigao del Norte sa nakalabay nga adlaw.
Naila ang biktima nga si Ryan Dave Alutaya, hingkod ang panuigon, assistant manager sa usa ka mining company sa lungsod sa Tubod, Surigao Del Norte og nagtungha pagka-abogado.
Bag-ohay lang sa dihang gikumpirma sa kabanay sa biktima nga moabot na ngadto sa lima ka adlaw nilang gipangita o nahimong missing ug wala na usab kini nakareport ngadto sa iyang gitrabahoan ang nasangpit nga biktima.
Anaa na sa ‘stage of decomposition’ ang lawas sa biktima ug deli na halos matud pa kini mailhan ang lawas sa gumikan nadugta niini ang pipila ka bahin sa ulo sa nahisgutang biktima sa dihang kini nakaplagan.
Sa social media, singgit karun ang hustisya sa kabanay sa biktima samtang duna pay post nga matud pa usa ka 18-anyos pa ang responsable sa kremin nga karun padayon pang gipangeta.
