BUTUAN CITY – Mag-atubang og mga kasong paglapas sa Republic Act 10591 (Comprehensive Firearms and Ammunition Regulation Act) ug sa Omnibus Election Code nga nagdili sa pagdala og armas ilabina karong election period ang mayor sa Nabalawag, Special Geographic Area-Bangsamoro Autonomous Region in Muslim Mindanao kon Nabalawag SGA-BARMM human nakuhaan og armas ug mga bala sa checkpoint sa Task Force Davao sa Sirawan, Toril, Davao City, pasado alas-10:00 kagabii, Pebrero 4.
Nai-ila ang mga nadakpan nga sila Mayor Anwar Saluwang, 49-anyos, duha niya ka mga bodyguards nga sila si Maroufh, 30-anyos, ug Prangco, 33-anyos; ug ang iyang drayber nga si Samsudin, 39-anyos.
Nadiskubre ang mga armas sulod sa gisakyan nilang usa ka pickup truck human namatikdan sa mga otoridad ang puluan sa pusil nga nigimaw duol sa drayber ug dihang gisusi, nakit-an pa ang laing pusil sa salog sa sakyanan, duol sa lingkoranan sa mayor.
Nakuhaan usab og tag-usa ka magasin nga may mga bala sila si Maroufh ug Prangco, hinungdan nga dali silang gisip sa mga otoridad.
Nasayrang mu-apil unta si Mayor Saluwang kalabot sa comprehensive training karong adlawa alang sa Efficient Fund Management sa Davao City uban sa lain pang mga mayor sa Special Geographic Area-BARMM.
