BUTUAN CITY – Ma-corner na unta sa mga kabanay ug silingan sa biktimang si Red Jean Alfeche ang wala pa mailang lalaking miluba-luba kaniya kung wala pa niini sipa-sipaa ang gabok nang bongbong sa kwarto sa biktima. Kini tungod kay samtang kamulo og dunggab ang suspetsado nga ginasagang usab sa biktima sa iyang kamot, madunggan man ang pagpangayo niini ug tabang ug ang linagubo sa sulod nga bahin.
Sa eksklusibong pakighinabi sa Bombo Radyo Butuan, gibutyag sa silingan sa biktima nga si Jason Daya Campaner, nga diha lang sila naglingkod gawas sa ilang balay dihang nakita niya ang motorsiklo nga maoy gisakyan sa lalaki apan tungod sa iyang pagtuo nga ang ka-ipon kini sa biktima nga mibalik sa agi kinsa padulong na sa trabaho, wala na lang niya kini panumbalinga.
Dihang nadunggan na niya ang biktimang misinggit ug mihangyo nga husto na tungod kay duna pa siya’y anak, didto na niya giduol ang lalaking sakay sa nagsilbing get-away vehicle kinsa nagbutyag nga igo lang matud pa kini namasayro ug gihulatan ang suspetsado nga duna matud pa’y gihatog nga parcel.
Gipanawag na dayon niya ang amahan sa biktima ug uban nilang silingan dayong sira sa pultahan sa balay sa biktima apan gisipa-sipa sa suspetsado ang gabok na nga dingding rason nga nakasibat.
