BUTUAN CITY – Patay nang naka-abot sa ospital ang usa ka taxi driver samtang angol ang tulo niini ka pasahero human nabanggaan sa usa Toyota Hilux pasado alas-11:10 kagabii sa national highway sa Purok 11, Brgy. Baan Km. 3 ning siyudad sa Butuan.
Naila ang taxi river nga si Vennie Moran Monteclaro, 56-anyos, minyo ug residente sa Aquarius St., Brgy J.P Rizal, ning siyudad.
Samtang ang iyang mga pasahero nga parehong nanga-angol nailang sila Nida Rosillo Madelo, 39-anyos, minyo, residente sa Purok Pag-asa, Brgy Rosario, Tandag City; Mary Ann Mahilum Borja, 34-anyos, ug Roberto Mahilum Pamaus Jr. 34-anyos, parehong minyo ug residente sa Purok kalipayan, Brgy. Bongtud, Tandag City.
Nasuta sa imbestigasyon sa kapulisan nga padulong sa direksyon sa Brgy. Ampayon ang taksi nga kusog ang dagan apan pag-abot sa dapit nga nahitabuan, kalit lang mi-u turn ang Hilux nga gimanehuan ni Elvis Castillo Estrella, 44-anyos, minyo, residente sa Purok-3, Brgy. Poblacion, RTR, Agusan del Norte, hinungdan sa aksidente.
Gidala na sa Agusan del Norte Provincial Hospital ang driver sa Hilux nga si Estrella samtang gikostudiya na usab sa Butuan City Police Station 1 ang duha ka mga sakyanan nga parehong duna’y dakong damyos.
