BUTUAN CITY – Napahunong sa United States House of Representatives ang paningkamot nga i-impeach si US Defense Secretary Pete Hegseth human mibotar ang mga kongresista nga i-refer sa House Judiciary Committee ang resolusyon nga naglangkob sa walo ka articles of impeachment batok kaniya.
Sa gihimong botohay, 211 ka kongresista ang mipabor samtang 204 ang misupak sa mosyon nga ipadala sa komite ang resolusyon nga gisang-at ni Republican Representative Thomas Massie sa Kentucky, nga usa sa mga kritiko sa administrasyon ni US President Donald Trump.
Lakip sa mga alegasyon batok kang Hegseth ang gika-ingong paglapas sa iyang kagahpon pinaagi sa pag-apil sa mga operasyong militar nga walay pagtugot sa Kongreso, kapakyas sa pagpanalipod sa mga sibilyan atol sa mga pag-atake, ug paggamit sa gahum sa Pentagon alang sa personal o politikal nga panimalos.
Gikwestiyon usab ang pipila ka desisyon sa iyang departamento kalabot sa mga operasyong militar batok sa Venezuela ug Iran.
Sa laing bahin, gisalikway ni Hegseth ang tanang alegasyon ug gipadayag ang iyang pagsalig nga husto ang iyang mga desisyon isip kalihim sa depensa.
Gisuportahan usab siya ni President Donald Trump taliwala sa impeachment bid.
Bisan napahunong ang maong paningkamot, wala kini magpasabot nga napamatud-ang walay basihan ang mga alegasyon batok kang Hegseth.
Nagpasabot lamang kini nga wala madayon ang impeachment proceedings sa House of Representatives, samtang nagpadayon ang panaglalis sulod sa Kongreso bahin sa paggamit sa gahum sa Pentagon ug sa papel sa mga magbabalaod sa pagmonitor sa mga operasyong militar sa Estados Unidos..
