BUTUAN CITY – Ubay-ubay nga mga isyu ang gidebatihan nila Republican vice presidential candidate JD Vance ug Democrat Tim Walz sa ilang una nga vice presidential debate nga gi-host sa TV network nga CBS News. Apil niini ang krisis sa Middle East, ilabina nga ning adlawa lang, naglusad ang Iran og missile attack ngadto sa Israel. Sigon sa Israel, na-intercept sa ilang Air Force ang kadaghanan sa mga missiles uban sa pag-abag sa US Air Forces Central Command.
Unang gipangutana si Democratic candidate Walz kung suportahan ba niya ang pre-emptive strike gikan sa Israel ngadto sa Iran. Ang unang topic nga ilang gidebatihan mao ang krisis sa Middle East apil na ang dakong damyos nga gibilin sa hurricane Helene ug ang labor strike kondiin 25-mil ka mga dock workers gikan sa Maine ngadto sa Texas ang nagrali.
Unang gihatagan og higayon si Tim Walz nga mapadayag ang iyang buhaton kung siya ang padesisyunon ug iyang gibutyag nga ang gikinahanglan niini nga isyu aron mresolba mao ang steady leadership ug dili ang gidak-on sa crowd kon katawhan nga maoy gihingusgan ni kanhi US President Donald Trump atol sa ilang debate ni Vice President Kamala Harris.
Gisaysay pa ni Walz nga nagsugod kini nga kagubot dihang gi-atake sa militanteng grupong Hamas sa Palestine ang Israel nga mikalas og gatusang Israelis. Sa ingon niini matud pa nga sitwasyon, dili angayang mukupot niini Trump tungod kay dili na lilong sa tanan kung unsa matud pa siya kadelikadong lider.
Samtang sa kabahinan ni JD Vance, mas gi-una niini pog pa-ila ila ang iyang kaugalingon apil na ang iyang background aron duna matud pa’y kasayuran ang katawhan sa iyang pagkatawo dayong butyag sa mga tawo sa iyang katuyuan pagdagan sa maong posisyon.
Gipadayag niini nga iyang nasabtan ang kabalaka sa katawhan kalabot sa gubot karon nga kalibutan nga hayan mahimong babag sa pagkab-ot sa damgo sa Amerika alang sa kaayuhan sa tanan. Gibutyag ni Vance nga kung mabalik lang sa White House si Donald Trump, kaya rang kab-uton ang damgo sa mga Amerikano.
Ginegar usab niini ang akusasyon ni Walz nga ahente matud pa sa kagubot si Trump sa rason nga mao kini ang naghatag og kalig-on sa kalibutan pinaagi sa pag-establisar matud pa og epektibong deterrents.
