BUTUAN CITY – Gi-awhag ni Lingayen-Dagupan Archbishop Socrates Villegas ang mga deboto Katoliko nga mulambigit sa himuong pagrosaryo batuk sa agresibong lakang sa China sa West Philippine Sea.
Ang “Rosary Campaign”, magsugod sa Hunyo 27 ug matapos sa Agosto 15 sa mismong adlaw sa ang kapiyestahan sa Solemnity of the Assumption of the Blessed Virgin Mary.
Gi-awhag usab ni Villegas ang mga tawo nga sa maong panahon, dapat maghinulsol usab kita sa atong mga sala ug mutabang sa mga kabus.
Gikabalaka sa kanhi pangulo sa Catholic Bishop Conference of the Philippines kon CBCP ang gihimong agresibong lakang sa China nga naka-apekto sa panginabuhian sa mga manginigsda ug pagkaguba sa kadagatan.
Nanawagan usab siya sa katawhan nga depensahan ang nasud ug ngadto sa militar aron magpatrolya sa kadagatan sa nasud aron maprotektahan ang mga mangingisda.
Mas maayo usab nga patubagon sa mga magbabalaud ang mga nagpaluyo sa mga hulga sa atong national security ug sa interest sa atong nasud.
