BUTUAN CITY – Naluwas ang duha sa unom ka na missing nga mga mangingisda sa gipahigayong search and rescue operation sa Philippine Coastguard kon PCG Search and Rescue Team uban sa Coast Guard Station Surigao del Norte inabagan sa uban pang units sa Coast Guard Mobile Team Surigao City, Coast Guard Special Operations Group – Northeastern Mindanao, Coast Guard Baywatch Patrol Unit – Northeastern Mindanao ug PCG Fast Patrol Boat (FPB) 151 sa pakig alayon sa CDRRMO Surigao City.
Naila ang naluwas nga sila Joseph Mapalo, 35 anyos, residente sa Brgy. Cagniog, Surigao City ug Jesmar Besing, 36 anyos, residente sa Brgy. San Juan, Surigao City. Nakita ang duruha sa kadagatan tali sa Bohol ug Siquijor.
Nangisda matud pa ang unom didto dapit sa kadagatan sa bisinidad tali sa Barangay Mabua ug San Ricardo, Southern Leyte, apan naguba ang gisakyang bangka tungod sa dagkong balod. Sukad pa niadtong Marso 1 ang unom gideklarang missing.
Gikatahong Pebrero 28 sa alas 5:00PM pa kini milawig gikan sa brgy Canlanipa, Surigao City para mangisda sa may parte Limasawa Island. Apan pagka Pebrero 29, bandang alas 5:45PM, sa dihang gilawig ang kadagatan dapit na sa San Ricardo Leyte, nasinati niini ang dagkong mga balod ug naunlod ang bangka.
Una silang napalgan sa usa ka fishing bangca nga FBCA Golden Top 888. Padayong gipangita ang upat pang na missing nga sila Timothy Codillo, Julieben Edranan, Alan Solitario ug Marcelo Doblas Jr.
