BUTUAN CITY – Giklaro ni Atty Proculo Sarmen, regional vice president sa Associated Labor Union-Trade Union Congress of the Philippines kon ALU-TUCP Caraga nga dugay na nilang gipangayo nga usbawan gayod ang suhulan sa mga empleyado sa tibuok nasud.
Subay kini sa bag-uhay lang gipadayag ni Senador Juan Miguel Zubiri nga pabor siya sa baruganan sa ilang grupo alang sa petisyon sa pagpataas sa sweldo sa mga empleyado base na usab sa giduso niini nga balaudnong tas-an og 150-pesos across the board ang minimum nga suhulan sa matag-empleyado kada-adlaw.
Sa eksklusibong pakighinabi sa Bombo Radyo Butuan, nanghinaut si Atty. Sarmen nga unta ma-aprubahan kini sa kongreso ilabina nga matag-tuig, kanunay nga magpagawas ang mga Regional Tripartite Wages and Productivity Boards kon RTWPBs sa tibuok nasud og wage order nga ubos ra kaayo sa poverty threshold.
Dugang sa abogado, bisan matud pa ang sugyot sa senate president gamay ra alang kanila sa rasong dili kini igo sa usa ka pamilyang duna’y lima ka mga membro.
