BUTUAN CITY-Hugot nga gikondena sa kadumalahan sa Agusan Del Sur Police Provincial Office ang gihimong pagpanulis sa aktibo nilang pulis didto sa Tagum City kagahapon sa alas 5:30 sa hapon.
Naila ang suspetsado nga si Pat Raph A Doria, aktibong miyembro sa Prosperidad Municipal POlice Station, sa Agusan del Sur, og residente sa P-24 Poblacion, Bayugan City, Agusan del Sur.
Natigayon ang insidente sulod sa GNG Passion Store Lapu-Lapu St. Magugpo Poblacion Tagum City diin misulod ang suspek nga nakasiblyan nga nagpaka-aron-ingnong kustomer.
Gidool niini ang biktimang si Jema Bucia Aquino, 30-anyos, dalaga, usa ka Sales Attendant, og residente sa Purok Vipatil Magugpo East Tagum City, diin ang suspect mideklara og hold up gamit ang pistola nga isyu kaniya sa gobyerno. Apan daling nakaresponde ang ginasakpan sa Tagum City Police Station diin malampusong na-aresto ang suspetsado.
Ang maong suspek, gikustudiya na karun sa Tagum City Police Station alang sa tukmang disposasyon.
Sa nahimong post sa facebook page, gipahayag ni PCOL JOVITO C CANLAPAN, Provincial Director sa Agusan Del Sur Police Provincial Office nga maka-uulaw ang maong panghitabo sa organisasyon sa Philippine National Police apan dayung klaro nga isolated lang ang insidente diin wala kini nagpresenta sa entiro PNP og wala kini nakaguba sa reputasyon nga na-establisar sa kapulisan sa Agusan Del Sur.
Dugang pa sa opisyal nga bisan og nagpadayon pa ang imbestigasyon apan gipaneguro nga dii nila e-tolerate ang maong matang sa pulis.
