BUTUAN CITY – Muabot sa 40 ka mga armas nga gipanag-iyahan sa usa ka security agency ang gikustudiya karun sa kapulisan alang sa safe keeping human ang kagubot nga nahitabo sa dihang gisirad-an ang usa ka mining company sa may Claver, Surigao Del Norte.
Sigon ni Police Major Dorothy Tumulac, tigpamaba sa Surigao Del Norte Police Provincial Office nga kabahin lang kini sa pagseguro sa kahapsay og kalinaw sa lugar.
Lakip sa lakang nga gibuhat sa kapulisan ang temporaryong pagtake-over sa kapulisan sa Claver Mineral Development Corporation kon CMDC human kini gipasirado sa lokal nga kagamhanan tungod sa pag-expire na usab sa ilang Mineral Production Sharing Agreement.
Seguraduhon usab sa maong team sa kapulisan nga walay aktibidad nga himoon sa maong kompanya hangtud nga walay permit nga ipagawas sa lokal nga kagamhanan sa Claver.
Ang bugtong gitugutan lang matud pa nga aktibidad sa maong minahan mao ang care and maintenance.
