BUTUAN CITY – Gikataw-an lang sa kadaghanang mga Butuanons apil na sa mga netizens ang proposed ordinance sa Committee on Transportation sa Sangguniang Panlungsod ning siyudad sa Butuan alang sa fare adjustment sa mga traysikol tungod sa ka-ulahi na matud pa kaayo niini.
Sigon sa uban, wala na’y nagplite karon og 8-pesos sa mga traysikol kondili 10-pesos na samtang ang uban manukot pa og 12-pesos sa unang upat ka kilometro ug mas taas pa kung layo-layo na ang biyahion.
Sa reaction sa mga netizens, ilang gisugyot nga unta manakay usab og mga de-pasayruang sakyanan ang mga city officials aron sila mismo makasayod nga wala na’y nangdawat karon og 8-pesos nga plitehan sa traysikol.
Duna usa’y nagsugyot nga mas maayo kung magsakayan usab og traysikol ang mga hingtungdang law enforcers aron sila na mismo ang mangdakop sa mga drayber nga hangtud karon, wala na gibalik sa 8-pesos ang minimum nga plitehan taliwa nga balik na sa normal ang capacity sa mga pampublikong sakyanan.
Samtang sa panig sa mga estudyante, usa si Saider Nadela nga taga-Guingona Subdivision sa Brgy. JP Rizal ning siyudad, mireklamo kini tungod kay sukad matud pa nagsugod ang face-to-face classes niadtong Agusto ning mi-aging tuig, 10-pesos na ang iyang pamasahe ug wala na siya hatagi pa og 20-porsientong diskwento isip estudyante.
Gani kung magabii, mas madoble pa ang iyang pamasahe tungod sa kawala na kaayo’y manakay nga mga pasahero ug magdumili na usab og hatud ang mga traysikol kung 10-pesos lang ang iyang iplite ilabina kung siya lang usa.
