BUTUAN CITY – Andam tabangan sa Butuan City Police Office ang pamilya sa usa ka amang nga namatay human mi-ambak sa patrol car sa Butuan City Police Station 4 dihang ilang gidala alang unta sa safe-keeping human kini nalambigit sa disgrasya niadtong Dominggo sa alas-8:30 sa gabii.
Sa eksklusibong pakighinabi sa Bombo Radyo Butuan, gipadayag ni Butuan City Police Station 4 Commander Captain Michael John Arandia, miresponde lamang sila sa police call kalabot sa aksidenteng natigayon sa Purok 3, Brgy. Cabcabon kondiin gibanggaan sa motorsiklong gimanihuan ni Joper Gomez, 48-anyos, minyo nga taga-Purok 15, Alviola Village, Brgy. Baan Km 3 ning siyudad ang 48-anyos nga ginang usab nga si Juanita Doogan, residente sa dapit nga nahitabuan.
Una matud pang gidala sa Agusan del Norte Provincial Hospital ang driver sa motorsiklo samtang dalhon na unta sa Butuan Medical Center ang nadasmagang ginang.
Dihang nakita nilang hubog ang amang nga si Raymond Cabalde, residente sa Purok 8, Brgy. Maug ning siyudad, ila usab kining gisakay sa patrol car aron unta didto na magpalabay og gabii sa ilang police station.
Dako na lang ang ilang kakurat dihang kalit lamang kining mi-ambak pagtungod sa may weigh bridge sa Brgy. Ampayon nga misangpot na hinuon sa iyang kamatayon.
