BUTUAN CITY – Gisugat og protesta si US House speaker Nancy Pelosi sa iyang pagbisita sa Taiwan tungod kay pipila ka mga Taiwanese ang dili ganahan sa iyang pagbisita.
Sumala ni Bombo International Correspondent Gina Lin direkta gikan sa Taiwan sa eksklusibong pakighinabi sa Bombo Radyo Butuan, alas-10:43 pa ning mi-aging gabii mi-abot si Pelosi sa Taiwan kansa nasayran gihapon sa mga Taiwanese taliwa nga wala kini sa iyang itinerary human nga nag-leak sa media ang impormasyon gikan sa US embassy hinungdan sa gilusad nga lihok protesta.
Nakigkita matud pa si Pelosi kang Taiwan’s President Tsai Ing-wen ug gibisita usab niya ang usa sa pinakadakong chips factory sa maong island nation.
Tungod niini, muhimo og tulo ka adlaw nga military drill sugod karong adlawa sa palibot sa maong nasud ang People’s Liberation Army sa China, kansang military aircrafts daan nang nagpalibot kanila.
Ang media lang matud pa ang nagpa-init sa pagbisita ni Pelosi sa Taiwan tungod kay ang mga ordinaryong katawhan nasayod na nga ang bugtong katuyuan lamang sa US Democrat sa ilang nasud mao lang ang pagbaligya sa ilang mga armas ug ipasi-atab nga kinahanglan nilang mupalit tungod kay anaa sila karon sa tensyon tali sa China.
Hinuon kampante silang dili maglusad og giyera ang China tungod lang sa maong pagbisita dungan sa pagklaro nga mas napa-init ang maong isyu tungod sa nagsingabot nila nga eleksyon karong Nobyembre kansa kanunay nang sugaton og tensyon ang matag-pahigayon nila og eleksyon.
Sumala ni Lin, dili malikayan nga mahadlok ang ubang mga overseas Filipino workers kon OFWs nga wala masayod sa tinuod nga istorya sa ilang nasud ug sa China.
Hinuon nanawagan kini sa mga kababayan dinhi sa Pilipinas nga duna’y kabanay ngadto sa Taiwan nga wala’y angayang kabalak-an bisan dunay gamay nga tensyon tungod dili kini seryoso nga issue ug siya mituo nga ang China dili mangitag away batok sa ilang nasud.
Tungod sa military drill, ubay-ubay nga mga flights ug shipping schedule ang gikansela aron dili madisgrasya sa pagsugod na sa military drill.
