BUTUAN CITY – Padayon pang gi-imbestigahan sa Butuan City Police Station kon BCPS-4 ang pagpanunog sa mga nagpa-ilang rebeldeng New People’s Army kon NPA ang tag-usa ka 10-wheeler ug 6-wheeler truck nga iya sa Primevibe Corporation nga nahimutang sa Purok 4, Barangay Sumilihon, ning siyudad sa Butuan pasado alas-8:45 kagabii.
Sa eksklusibong pakighinabi sa Bombo Radyo Butuan, gipadayag ni Butuan City Police Office spokesperson Major Riza Torotoro nga ang mga responsable kinsa nagsuot pa og kolor green nga sweat shirt nga duna’y NPA logo, nakasulod sa compound agi sa likod nga bahin kondiin ilang gilayat ang 30 ka tiil nga gihabukgong pader gamit ang improvised nga hagdan.
Una matud pa nilang giduol ang gwardiya kinsa gidis-armahan pa samtang lain usab ang misulod sa staff house diin nagpuyo ang branch manager uban sa iyang pamilya.
Didto matud pa gisukna sa grupo ang branch manager kalabot sa wala niini pag-aksyon sa ilang hangyo ning mi-aging semana.
Gidala matud pa sa mga reponsable ang mga personal nga gamit dayong sunog sa mga sakyanan ug namidpid pagsibat sa kasagbutang bahin.
