BUTUAN CITY- Gitugotan sa International Criminal Court kon ICC ang prosekusyon nga ipasulod isip ebidensiya ang unang na-record nga testimonya sa usa ka witness nga giila isip P-1100 sa kaso batok kang kanhi Presidente Rodrigo Duterte, kalabot sa giingong crimes against humanity of murder.
Sa desisyon sa Trial Chamber III niadtong Oktubre 2, 2026, giingon sa korte nga ang testimonya mahimong gamiton ubos sa Rule 68(3), apan kinahanglan gihapon nga motungha si P-1100 ug mosugot sa paggamit sa iyang sinulat nga pahayag.
Gitino usab sa Chamber nga adunay higayon ang depensa nga pangutan-on ang witness bahin sa iyang testimonya, ug gimandoan ang prosekusyon nga limitahan ngadto sa usa ka oras ang supplementary examination imbis sa ilang gisugyot nga duha ka oras.
Samtang gisalikway sa Chamber ang upat ka supporting materials nga gustong iapil sa prosekusyon tungod wala kini igo nga gigamit o gipatin-aw sa witness, gitugotan hinuon ang lima pa ka materyales nga giisip nga integral sa iyang testimonya.
Ang desisyon usa pa lamang ka preliminary ruling ug ang gibug-aton o probative value sa testimonya pagahukman pa sa Chamber isip kabahin sa kinatibuk-ang pag-evaluate sa ebidensiya sa kaso.
