BUTUAN CITY – Plano karon sa Kapisanan ng mga Brodkaster ng Pilipinas kon KBP nga mukuha og certificate gikan sa National Telecommunications Commission kon NTC human nagpagawas ang NTC og memorandum order kalabot sa pagkuha una og permit ngadto kanila adiser tugutang maka-ere ang mga block timers sa radyo ug telebisyon.
Sa eksklusibong pakighinabi sa Bombo Radyo Philippines, gibutyag ni KBP President Bombo Herman Basbaño, dili sakop sa hurisdiksyon sa NTC ang gusto nilang mahitabo sa gipagawas nilang memorandum ilabina nga hisgutan dinhi ang content ingon man constitutionality ug uban pa nga angayang klaruhon.
Giklaro ni Basbaño nga dii lang dinhi sa nasud kondili sa bisan asang bahin sa kalibuta, gitugutan ang pag-ere sa mga block timers isip kabahin sa pag-outsource sa mga programa gawas sa mga network-produced nga mga programa ingon man co-produced programs ug kadtong mga third party aron musulod ug magbutang og ilang kaugalingong programa kansa ginadasig pa sa ubang kanasuran.
Gikatingala usab sa opisyal kung nganong unang nagpagawas og memo ang NTC unya sa sunod semana pa himuon ang hearing alang sa unod sa gipagawas nilang memorandum.
Aminado ang opisyal nga dako ang mahatag niining epekto sa atong nasud ilabina sa isyu sa constitutionality ilabina ang ma-apektuhang mga radio ug TV stations nga nagsalig sa ilang kita diha sa mga block timers.
Gawas pa, duna na’y Supreme Court ruling nga nagbutyag nga wala’y hurisdiksyon ang NTC sa content sa progama gawas lamang sa mga gipangtaud nga ekwipo sa matag-istasyon.
