BUTUAN CITY – Ang paglapas sa due process sa pagpasaka og kaso ang hinungdan nga gibasura ni Bayugan City Regional Trial Court Branch 7 acting presiding Judge Fernando Fudalan Jr. ang mga kasong kidnapping ug serious illegal detention nga gipasaka batuk kang community doctor-activist Dr. Natividad ‘Naty’ Castro.
Base kini sa resolution nga gipagawas sa huwis pinetsahan niadtong Marso 25, gi-dismiss ni Judge Fudalan ang maong mga kaso tungod usab sa kakulang sa probable cause pag-issue og warrant of arrest.
Sa eksklusibong pakighinabi sa Bombo Radyo Butuan, gipadayag sa manlalaban ni Dra. Castro nga si Atty. Wilfred Asis nga migawas sa pagtuon sa huwis sa maong kaso pinasubay sa balaud nga wala’y basehan aron dakpon ang community doctor ug bilangguon daw sama na sa konbiktado.
Dili matud pa magpataka og pagawas og resolusyon si Judge Fudalan kung nakita niyang wala’y due process nga gihatag ngadto sa panig sa akusado ilabina kung kulang ang ebidensya.
Gidugang pa ni Atty. Asis nga aduna’y gihimong preliminary investigation apan wala matud pa magsunod sa balaud tungod kay gihimong basehan sa pagpasaka og kaso ang mga butang-butang nga alegasyon.
