BUTUAN CITY – Wala na gikakurat pa ni Surigao del Sur Rep. Prospero Pichay Jr. ang pagbasura sa COMELEC sa disqualification case nga gipasaka batuk kaniya ni Construction Workers’ Solidarity Party-list Rep. Romeo Momo.
Gideklara usab sa COMELEC nga wala’y sayop nga material representation dihang gideklara ni Pichay nga eligible siyang mudagan sa katungdanan.
Sa eksklusibong pakighinabi sa Bombo Radyo Butuan, gipadayag ni Pichay nga susama ra kini sa petisyong una nang giduso ni Momo sa mi-aging mga eleksyon kansa balik-balik nang gibasura sa COMELEC ingon man sa House of Representatives Electoral Tribunal (HRET).
Dugang sa kongresista, ang penalty nga perpetual disqualification dili pa final tungod kay gi-apela pa kini sa Korte Suprema.
Wala matud pa’y dag-anan ang iyang mga kontra sa unang distrito sa ilang lalawigan rason nga kada-eleksyon silang magduso og disqualification case nga balik-balik nang gipasaka bisan og balik-balik na usab kining gi-dismiss sa COMELEC.
Susamang taktika matud pa ang gihimo sa iyang kontra sa pulitika niadtong 2016, 2019 apil na sa HRET kansa parehong gibasura.
