BUTUAN CITY – Ubay-ubay nga mga benepisyo ang makuha sa mga negosyante ning siyudad sa Butuan ug lalawigan sa Agusan del Norte karong gipa-ilalom na sa alert level 2 ang siyudad.
Sa eksklusibong pakighinabi sa Bombo Radyo Butuan, gipadayag ni Joey Tan, presidente sa Filipino-Chinese Chamber of Commerce Butuan/Agusan del Norte chapter nga apil niini ang pagtangtang na sa curfew hour ingon man liquor ban kansa sukwahi niadtong anaa pa sa alert level 3 kondiin pag-abot sa alas-singko sa hapon, dili na makapalit pa og ilimnong makahubog.
Sigon ni Tan, dakong tabang kini sa mga negosyante ilabina nga kung musulod sa mga business establishments ang mga tawo tungod kay vaccination card na lang o kaha certificate ang ipakita samtang ang mga taga-gawas sa Caraga Region, mahimo nang makasulod nga dili na pangitaan pa og S-Pass ug dili na usab required nga magpa-RT PCR test paglabay sa lima ka mga adlaw.
Sukwahi matud pa ang alert level 2 kaysa alert level 3 diin mas istrikto ang mga patakarang gisunod kansa naka-apekto dili lang sa ilang kinitaan kondili apil na sa mga trabahante nga mabalaka pa sa posibilidad nga madakpan sa ilang pagpa-uli tungod sa gipatumang curfew hour.
Apan giklaro ni Tan nga wala sila maglaum nga makaginansya og dako tungod kay target nilang makabawi-bawi lang ilang puhunan.
