BUTUAN CITY- Giklaro sa lokal nga paggamhanan sa dakbayan sa Butuan nga wala pa gihapon giwagtang ang kamanduan sa pagsuot og face shield sa syudad.
Sumala kang Michiko De Jesus tigpamaba sa LGU-Butuan sa pakighinabi ning sibyahan, nagtunhay pa gihapon ang ordinansa dinhi sa syudad nga nag-obligar sa mga katawhan nga magsuot og face masks ug face shields labi na matag gawas sa panimalay tungod kay wala nalakip ang Caraga Region labi na ang syudad sa Butuan sa bag-ong kamanduan sa nasudnong kagamhanan nga bulontaryo na lamang ang pagsuot og face shields sa mga lugar nga anaa ubos sa Alert Level 1 hantod 3.
Gipasabot ni De Jesus nga tungod kay ana pa gihapon ang syudad sa General Community Quarantine kon GCQ ug wala pa sa gitawag alert level system magpabiling ipatuman ang executive order nga nag-obliga sa katawhan sa pagsuot sa maon mga proteksyon labi na ang face shields.
Madumduman, by phase ang gipatumanng alert level system sa nasudnong kagahamhanan nga unang gisugdan sa National Capital Region.
Gipasalig hinuon nga ugaling muabot na ang torno sa syudad, gilayong magpagawas ang LGU-Butuan og abiso nga bulontaryo na lamang ang pagsuot sa face shield.
Apan sa karon nga wala pa kini miabot hugot nga panawagan sa tigpamaba nga sundon pa gihapon nga suoton ang mga niini aron malikayan ang subling pagsaka sa kaso sa covid-19.
