BUTUAN CITY – Wala’y nadawat nga reklamo ang lokal nga kagamhanan ning siyudad sa Butuan kalabot sa gika-ingong duna na’y nagkatag nga mga peke nga vaccination cards.
Sa eksklusibong pakighinabi sa Bombo Radyo Butuan, gipadayag ni Butuan City government spokesperson Michiko de Jesus, duna na sila’y ndungog niini nga isyu apan wala pa sila nakadawat og reklamo.
Gawas pa, gipadayag sa opisyal nga sa pagkakaron, ang maong card gigamit pa lang sa travel requirement ilabina sa mga flights.
Samtang sa hisgutanan usab sa National Digital Vaccine Certificate kon VaxCertPH, wala pa kini gipatuman sa tibuok nasud.
Nasayrang ang maong crtificate mao ang maghi-usa sa tanang mga vaccination cards nga gi-isyu sa mga LGUs sa tibuok nasud nga gilusad sa Department of Information and Communications Technology (DICT) niadtong Lunes kondiin sa pagkakaron, gigamit lang kini pagbiyahe sa abroad.
Gidugang pa ni de Jesus nga wala gi-dasig sa city government ang paggamit sa mga peke nga vaccination cards tungod kay mahimong masilutan ang muhimo niini.
Mabutang matud pa sa risgo ang usa ka indibidwal nga muhimo niini hinungdan nga karon pa lang, nanawagan na ang opisyal ngadto sa tanan nga magpabakuna kung gusto nilang makabaton og lehitimong card.
