BUTUAN CITY- Nasikop na ang usa sa mga mipusil sa driver sa single motor kagabii diha sa Purok-25, Brgy. Baan Km.3 ning syudad pasado alas 9:30 sa gabii.
Sa eksklusibong pakighinabi ning sibyahan kang PMaj Emerson Alipit ang tigpamaba sa BCPO, giila niini ang biktima nga si Sonny Pino Eduria, 22 anyos, ulitawo ug residente sa naasoy nga barangay kauban ang naka backride nga igsoong babae niini nga si Jenesa Pino Eduria.
Samtang ang suspek naila usab nga si Miguel Felias, 22 anyos, ulitawo ug residente sa Purok-7 Brgy. Ong Yiu ning sydudad.
Sa pag asoy sa igsoon sa biktima, gibutyag matud pa niini nga samtang sila nagbyahe pauli gikan sa syudad nga bahin, namatikdan na niini nga dunay nagsunod kanilang motor ug dihang nakadikit na kini kanila, gilayong gipusil sa makatulo nga higayon ang biktima sa wala nga bahin sa lawas niini nga maoy hinungdan sa pagkahulog sa ilang gisakyang motor sa kilid sa dalan hangtod nga nangayo og tabang ang igsoon ug narespondehan gilayon sa kapulisan.
Sa karun padayon pa usab nga gitambalan ang biktima sa hospital.
Nasayran nga usa sa mga motibo matud pa sa suspek mao ang panagbangi sa pwesto sa biktima nga anaa nahimutang sa may Brgy Lion Kilat ning syudad.
Sumala pa ni Maj Alipit nga gisay-say usab sa igsoon sa biktima nga nailhan gilayon niini ang mipusil tungod kay klaro ang gisuot nga helmet niini ingun man wala usab makasuot og facemask.
Tungod niini, gilayong mihimo og hot pursuit operation ang kapulisan aron adtu-an ang panimalay nga gitudlo sa igsoon sa biktima ug dinhi nasikop na ang suspetsado.
Gibutyag pa ni Maj. Alipit nga padayon pang gipangita sa kapulisan ang ka-riding in tandem sa suspetsado ingun man padayon pa usab ang investigaton human nga walay narekober nga armas sa mismong panimalay sa suspek ang mga kapulisan tungod kay dinali-an lang matud pa ang nasangpit nga operasyon.
Samtang gi-andam na usab ang kasong ipasaka batok sa suspetsado.
