BUTUAN CITY – Dismayado na usab si Butuan City Ampayon Brgy. Kapitan Rodencio Basubas Jr., tungod kay sa ikalimang higayon, gisuspende na usab siya ni Butuan City Mayor Ronnie Vicente Lagnada nga mi-epekto niadtong Septembre 10 ning tuiga.
Kini human siya mibalik paglingkod niadtong Agusto 10, dihang iyang natapos ang ika-upat nga tulo ka buwang suspensyon.
Sa eksklusibong pakighinabi sa Bombo Radyo Butuan, gipadayag ni suspended Brgy. Captain Basubas nga ang iyang katawhan ang nag-antus sa matud pa duna’y bahid sa pulitika nga paglutos kaniya tungod sa mga suspensyong gipahamtang pila ka semana lang human ang iyang pormal nga paglingkod sa pwesto human midaog sa barangay elections.
Sigon ni Basubas, bisan pa man sa giduso niyang motion for reconsideration tungod sa nagtunhay pa gihapong COVID-19 pandemic, wala kini paminawa sa buhatan sa mayor ug gipahamtang ang unom ka buwang suspensyon nga nag-ugat sa kontrobersyal nga acknowledgment receipt nga gi-isyu sa ilang barangay treasurer ug collector tungod sa kawala’y gihatag kanilang resibo gikan sa City Treasurer’s Office.
