BUTUAN CITY – All set na ang Bombo Radyo Philippines uban sa Bombo Radyo Philippines Foundation Incorporated alang sa tinuig nga biggest ug bloodiest blood-letting activity sa tibuok Pilipinas nga ‘Dugong Bombo 2026 A Little Pain, A Life To Gain’ nga himuon karong Nobyembre 14 ning tuiga sa Activity Center, 3rd Floor sa SM City Butuan.
Sigon ni Bombo Maylen Binalay, ang chairman sa Dugong Bombo 2026, taud-taud na nila kining gipangandaman bisan og kada-tuig na kining gihimo sa network aron makatabang sa mga tawong nanginahanglan og dugo ilabina kadtong duna’y gihambing balatian aron masumpayan ang ilang kinabuhi.
Sigon ni Binalay, sama sa nangaging katu-igan, target karon sa Bombo Radyo Philippines nga malabwan ang natigom nga dugo ning mi-aging tuig pinaagi sa hini-usang pagtinabangay sa mga Bombo Radyo ug Star FM stations sa tibuok nasud ka-uban ang mga volunteers, sponsors, Philippine Red Cross ingon man security forces nga magsigurong luwas ang entiro adlaw nga kalihukan.
Dugang ni Binalay, timing ang paglusad sa maong blood-letting activity tungod kay niining hinapos nga kwarter sa tuig, ubay-ubay nga mga lugar sa Pilipinas ang duna’y natala nga mga kaso sa dengue.
Ang maong kalihukan usa lamang sa mga programa sa network nga nagtinguhang duna’y igong stock sa dugo ang mga blood banks sa tibuok nasud.
Pinaagi usab niini, nahatagan og kasayuran ang mga Filipino sa tibuok nasud sa kamahinungdanon niini rason nga bisan asa na ang gilusad nga mga blood-letting drives hinungdan nga makonsiderang kining ‘Mother of All Blood-letting activities’ sa nasud.
