BUTUAN CITY – Gihulatan karon sa lokal nga kagamhanan ning siyudad sa Butuan ang ipagawas nga resolusyon sa Regional Task Force-One Caraga Shield sa sunod na guidelines human nga nakatala na og tulo ka mga COVID-19 Delta variant ang rehiyon. Kini taliwa nga pabiling ipatuman ning siyudad ang General Community Quarantine kon GCQ with heightened restrictions sugod karong adlawa hangtud Agusto 31.
Sa eksklusibong pakighinabi sa Bombo Radyo Butuan, gipadayag ni Michiko de Jesus, tigpamaba sa Butuan City government nga kung unsa man ang ipagawas nga guidelines sa One Caraga Shield, andam kining sundon usab sa Incident Management Team kon IMT nga mao usa’y ipatuman ning siyudad.
Alayon niini, giklaro ni de Jesus nga base sa gipagawas nga Executive Order No. 38 sa buhatan ni Mayor Ronnie Vicente Lagnada, susamang guidelines lang gihapon ang ipatuman sa musunod nga duha ka semana.
Apil niini ang curfew hours nga mu-epekto gikan sa alas-12 sa tungang gabii hangtud na sa alas-kwatro sa kaadlawon; liqour ban gikan sa alas-singko sa hapon hangtud na sa alas-singko sa sayong buntag ug ang pagpatuman pa sa tag-tulo ka adlaw nga color-coded quarantine pass.
Samtang sa pa-ugnat sa kusog, giklaro ni de Jesus nga bugtong gitugutan lang nga himuon ang mga non-contact sports sama sa jogging, badminton, ug uban pa.
Samtang sa vaccination roll out gamit ang Sinovac vaccines, giklaro sa opisyal nga ipadayon nila karong semanaha ang pagtupok sa second dose ngadto sa mga anaa sa priority groups A1 hangtud sa A4.
Ma-avail pa usab ang first dose niadtong wala pa makabakuna diha sa upat ka mga vaccination sites ning siyudad.
Alayon niini, nanawagan ang opisyal ngadto sa tanan nga seguruhong magpabakuna aron makalikay sa grabeng simtomas higayong mataptan sa COVID-19.
