BUTUAN CITY – Bukas sa bisan unsa mang himuong imbestigasyon ang Regional Maritime Unit-13 kalabot sa pagkapusil-patay sa usa ka mananagat didto sa kadagatan sa Brgy. Calibunan sakop sa Cabadbaran City.
Giklaro ni PLCol. Mario Cristino Lucero, officer-in-charge sa Regional Maritime Unit-13 nga lehitimo ang operasyong gihimo sa mga sakop sa PNP Maritime Butuan City/Agusan del Norte niadtong Sabado – ang adlaw dihang napusilan-patay ang mananagat nga si Ikiel Kintanar.
Sa ekskluksibong pakighinabi sa Bombo Radyo Butuan, gipadayag sa opisyal nga dokumentado sa ilang buhatan ang maong operasyon aron masigurong nahimo nila ang tahas nga bantayan ang kadagatan sa ilang area of responsibility batuk sa mga muhimo og ilegal nga pagpangisda.
Dugang ni Col. Lucero, gawas sa lehitimong operasyon, mi-aksyon usab ang iyang mga sakop base sa sumbong sa usa ka volunteer group nga Butuan City Fisheries Aquatic Resources and Management Council kansa mitabang sa ilang law enforcement operations.
Base matud pa sa asuy sa iyang mga sakop, nanawag sa maong tropa nga naglusad og seaborne patrol ang ilang lookout dihang nasigpatan ang grupo nila Ikiel Kintanar kinsa milambigit matud pa sa ilegal nga pagpangisda ug dihang nakita ang ilang tropa gidali matud pa og hipos ang ilang likum kansa hugot nga gidili.
Gipahunong matud pa sila sa tropa apan daling misibat ug tungod kay daan na silang gipahibalo nga duna matud pa’y armas ang nasangpit nga mga mangigisda rason nga nag-amping ang ilang tropa.
Dinhi na maud pa daw duna’y gipunit ang usa sa mga mangingisda nga gisundan sa buto sa armas rason nga mibalos usab ang ilang personahe pinaagi sa pagtiro sa makina nga bahin sa sakyanan apan mi-igo kini kang Kintanar hangtud nga nagpadayon matud pa sa pagpadagan og nasibatan na ang ilang tropa.
Kini nga pamahayag kansa nakalatid usab sa ilang incident report, sukwahi sa nakalatid sa Cabadbaran City Police Station nga mao usa’y gipa-abot nga report ngadto sa Agusan del Norte-PPO nga gipasalbahan matud pa sa taga-Maritime ang maong mga mangingisda.
Kagahapon, gipanghimakak ni Norven Cuevas ang alegasyon sa mga responsable nga ilegal ang ilang gigamit nga pangisda tungod kay dagko matud pa og mata ang ilang gipangdalang pukot gawas nga ila lang silang nag-arya sa distansyang 15-metros ug dihang minos ang nakuhang isda, nagliba na usab sila hangtud nga nagdesisyong manghipos na aron manguli apan kalit nga nangabot ang nagpatrolyang walo ka mga sakop sa PNP Maritime nga nani-on ug nagpabuto kanila.
