BUTUAN CITY – Wala’y angayang kabalak-an ang mga transport operators sa pagpabalik sa 50-porsientong sitting capacity sa ilang mga sakyanang mamasada human nga subling gipa-ilalom sa Modified Enhanced Community Quarantine kon MECQ ang dakbayan sa Butuan apil na ang lalawigan sa Agusan del Sur.
Kini ang giklaro ni Land Transportation, Franchising and Regulatory Board kon LTFRB-Caraga OIC regional director Ma. Kristina Cassion.
Sa eksklusibong pakighinabi ning sibyahan, gibutyag niini nga dili lang ang mga anaa sa transport sector kondili bisan sila, nakuratan sa desisyon sa IATF nga ipa-ilalom sa MECQ ng Butuan hinuon wala sila’y nadawat nga violent reaction gikan sa maong sektor.
Giklaro ni Cassion nga hatagan og ayuda sa nasudnong kagamhanan pinaagi sa Contract Service Program ang nasangpit nga mga transport operators.
Ubos sa maong programa, bayran ug 27-pesos matag-kilometro ang ihap sa pasaherong wala makarga sa ilang matag-biyahe base na usab sa nakalatid sa Bayanihan to Heal as One Act.
