BUTUAN CITY – Padayon gihapon ang registration sa Commission on Elections kon COMELEC-Butuan alang sa tanang gustong musalmot sa national ug local elections karong Mayo sunod tuig 2022.
Sa eksklusibong pakighinabi sa Bombo Radyo Butuan, gipadayag ni Butuan City election officer Atty. Samuel Rollo, nga gitugutan na sa ilang sentrong buhatan ang ilang mga field offices nga magpahigayon og satellite registration apan ubos sa pipila ka mga kondisyon sukwahi niadtong mi-aging mga panahon wala pa ang COVID-19 pandemic.
Kini pinaagi sa pagsunod gihapon sa minimum health standards ug kinahanglang makonsiderang low-risk ang lugar nga pahigayunan niini kondiin wala kini makatala og kaso sa COVID-19 sa nakabalay’ng 14 ka mga adlaw.
Gani ning adlawa, didto sila sa Brgy. Aupagan nagpahigayon og satellite registration nga gihimong stationary hinungdan nga ang ilang buhatan ning adlawa, wala nagdawat og mga registrants.
Kini tungod kay kadaghanan sa ilang mga personahe uban man sa ilang kalihukan ug ugmang adlawa, didto na usab sila sa Brgy. Maguinda.
Gidugang ni Atty. Rollo nga kada-Biernes ug Sabado lang nila kini himuon. Mala-umon ang opisyal nga pag-abot sa Agusto o kaha Septembre, makahimo na usab sila og mall registration higayong tugutan na sa ilang sentrong buhatan.
