BUTUAN CITY – Gikondena sa Bayan Muna partylist ang pinaka-ulahing pamahayag ni Pangulong Rodrigo Duterte dihang gibutyag niining usa lang ka ordinaryong papel nga mahimong ilabay sa basurahan ang pagpabor sa permanent court of arbitration sa International Tribunal of the Law of the Sea kalabot sa claim sa Pilipinas sa West Philippine Sea kansa wala gi-ila sa China.
Sa eksklusibong pakighinabi sa Bombo Radyo Butuan, gipadayag ni Bayan Muna Rep. Carlos Isagani Zarate nga makasaysayanon ang maong desisyon nga gihimo pa ganing basehan sa ubang mga claimant countries sa pipila ka bahin sa South China Sea.
Giklaro niining dili entiro South China Sea ang nadag-an sa Pilipinas kondili mao lang ang parte nga nasulod sa atong exclusive economic zone kon EEZ nga mao ang Julian Felipe Reef.
Sigon sa kongresista, ang gihimo sa pangulo magpasamot lang pagpangbastos sa China sa atong nasud. Giklaro pa ni Zarate nga suportado nila ang baruganan ni kanhi Senior Associate Justice Antonio Carpio kinsa usa sa mga eksperto sa maong claim.
Tungod niini, panawagan niya sa administrasyon nga barugan ang desisyon sa permanent court of arbitration.
Ang angayan matud pang himuon sa kagamhanan mao ang pagpangayo og suporta sa United Nations aron dili ma-adto sa China ang katungod sa Pilipinas nga mapahimuslan ang mga resources nga anaa sa maong parte sa dagat nga kabahin sa EEZ sa Pilipinas.
Mahimo matud pang tugutan ang ubang mga nasud apan dili sa punto nga mukalit lang og sulod dayong kuha sa mga resources sama sa gihimo sa China.
