BUTUAN CITY – Nadakpan sa mga otoridad ning rehiyon sa Caraga ang regional Secretary General sa Alliance of Concerned Teacher kon ACT kinsa wanted sa kasong attempted homicide human ang malampusong law enforcement operation nga gipahigayon sa Montilla Blvd., sa Brgy. Rajah Humabon, ning siyudad kaganinang alas-4:30 sa hapon.
Naila ang nadakpang si Rosanilla Consad alyas Lai, 54-anyos og residente sa Diamond St., B6, L22, Rosewood Plains Subd., Phase 2, sakop sa Brgy. Villa Kananga ning siyudad ug assistant principal sa San Vicente National High School.
Bitbit ang arrest warrant nga gi-isyu sa 10th Judicial Region, Municipal Circuit Trial Court, Tubay-Santiago, Agusan del Norte sa kasong attempted homicide nga duna’y pyansang 36-mil pesos, nasikop kini sa mga operating troops sa Regional Intelligence Division 13, Regional Intelligence Unit 13, National Intelligence Coordinating Agency (NICA) 10, ug Butuan City Police Station 1 uban sa mga sundalo.
Gilambigit si Consad sa pag-atake ug pagpusil kang PFC Junrel Cornelio ug CAFGU Active Auxiliary Emiliano Sajol, Jr., nga mga membro sa 29th Infantry Battalion, Philippine Army atol sa combat patrol operation sa Sitio Manhupaw, Brgy. Poblacion 2, lungsod sa Santiago, Agusan del Norte niadtong November 21, 2020.
Nasayrang si Consad ang gitudlong hepe sa Regional Urban Committee (RUC), Regional White Area Committee (RWAC), Northeastern Mindanao Regional Committee (NEMRC) ug nalista isip top 18 sa Communist Terrorist Group (CTG) Priority Target sa PNP Caraga.
Membro usab siya sa General Assembly Binding Women for Reforms, Integrity, Equality, Leadership, and Action kon GABRIELA ug milambigit sa mga protest actions ning siyudad sa Butuan niadtong September 20, 2019, atol sa ika-47 nga paghandom sa martilal law ug sa kasa-uluan sa Labor Day niadtong Mayo 1 sa susamang tuig.
Migawas sa intelligence report nga nalambilgit usab si Consad sa pagpang-recruit sa mga batan-on ug mga estudyante aron mahimong membro sa walhong kalihukan.
