BUTUAN CITY – Giduso karon sa Butuan City Transport Federation ngadto sa lokal nga kagamhanan ang gitawag nilang ‘adoption’ sa mga orange tricycles isip long-term solution human ang pagpatuman sa city government kanila pag-agi ug pagtabok sa national highway.
Sa eksklusibong pakighinabi sa Bombo Radyo Butuan, gipadayag ni federation president Jun Ybañez nga ubos niini nga sugyot, ang mga yunit sa ilang grupo, i-adopt na ang kolor sa ubang mga de pasayruang traysikol sama sa pula, yellow ug green.
Gipasabot ni Ybañez nga pinaagi niini, makunhuran na unya ang problema sa transportasyon ilabina niadtong mga nagpuyo sa mga barangay nga layo sa sentrong bahin ning siyudad ug wala’y laing mode of transportation kondili ang mga orange tricycles lang.
Usa matud pa sa qualification sa adoption nga kinahanglang ang yunit nga mag-adopt og laing kolor, residente sa dapit diin magdagan ang gusto nilang kolor apan kini magdepende gihapon matud pa sa mga barangay officials ug sa mismong city government.
Una nang gibutyag ni Ybañez nga duna na’y gihan-ay nga band-aid solution ang Butuan City Transport Federation alang sa mga orange tricycle drivers sa ingon magpadayon ang ilang pamasada bisan pa man sa pag-ban kanila pagsubay ug pagtabok sa national highway.
Kini pinaagi sa pagpasa-pasa sa ilang mga pasahero sama sa niadtong padulong o kaha pabiya sa sidlakang bahin ning siyudad nga kinahanglan pang mu-agi sa tulay Magsaysay.
Gibutyag niining diha lang kutob sa terminal sa J Flores Avenue ang mga pasahero kinsa sugaton na lang sa ilang mga ka-ubanang nagmaneho og rela aron ipasa na usab sa ilang mga ka-ubanang naghulat sa viaduct area aron ihatud na sa ilang destinasyon.
Wala matud pa’y angayang kabalak-an tungod kay mao ra gihapon ang plitehan gumikan kay tungaon man sa duha ka hingtungdang drivers ang pamasahe. Maa-umon ang opisyal nga unta mapatuman na kini karong adlawa.
