BUTUAN CITY – Masayran na karong hapun ang general result sa gilusad nga compulsory drug test sa Philippine Drug Enforcement Agency kon PDEA-Caraga ngadto sa tanang 48 ka mga personahe sa Butuan City Jail ug 160 ka mga persons deprived of liberty kon mga piniriso kaganinang buntag.
Sigon ni CIty Jail Warden Sr. Insp. Joven Auza, ang 160 ka mga PDLs kon pinirisong gi-drug test, 30-porsiento lang sa kinatibuk-ang 523 nila ka mga binilanggo.
Sa eksklusibong pakighinabi sa Bombo Radyo Butuan, gibutyag sa opisyal nga naghatag lang sila og master list sa ilang mga PDLs ug ang taga-PDEA Caraga na ang nagpili sa ilang gi-drug test.
Tumong niini nga masigurong luwas gikan sa ginadiling druga ug mga gumagamit niini ang ilang pasilidad.
Giklaro pa sa opisyal nga ang ilang mga personaheng magpositibo sa drug test, pasakaan sila og kasong kriminal ug administratibo nga kung mapamatud-ang migamit gyod sila, posibleng tangtangon pa sa serbisyo.
Samtang ang mga pinirisong magpositibo usab sa drug test, ipa-ilalom sa therapeutic community modality program.
