BUTUAN CITY – Gi-inquest na sa City Prosecutor’s Office kagahapon ang reklamong paglapas sa Batas Pambansa Blg. 6 kon illegal possession of bladed weapon batuk sa nagpa-ilang supremo ingon man membro sa tribong Lapaknon – nga naila sa pagpangilog og mga titulado apan bakanteng yuta.
Kini human sila nadakpan ning mi-aging alas-3:30 sa hapon sa may Purok 8, Brgy. Obrero ning siyudad sa Butuan.
Sa pakighinabi ning sibyahan, gibutyag ni Kapitan Fernan Rivero sa Brgy. Obrero nga samtang nagprepara unta alang sa tukurong balay sa maong purok sila Reynante Eva Asaytona, 52-anyos, minyo ug residente sa Purok 4, Brgy. Ambago ning syudad ug nagpa-ilang supremo, iyang asawa ug ang membro niining si Lucilo Amora Escobido, 57-anyos, minyo ug residente sa Purok 4, Brgy. Banza.
Mitawag gilayon siya og kapulisan sa Butuan City Police Station 2 ug daling miresponde sila PSSgt Enriquito Lahaylahay ug Patrolman Christopher Olaco, parehong na-detail sa Task Force Bantay Butuan (TFBB) uban sa mga personahe sa Task Force Bantay Butuan, Resettlement, Relocation ug Anti-Illegal Task Group hinungdan sa ilang pagkasikop.
Alayon niini, mihangyo si Kapitan Rivero ngadto sa mga residente sa Purok 8 nga kung duna matud pa nagplano nga magpamyembro o mopuyo sa maong luna nga gi-angkon sa tribung Lapaknon mahimong moduol una sa ilang barangay office aron mapasabot ug aron usab dili malakip sa mga nabiktima sa maong mangingilad nga tribu.
