BUTUAN CITY – Gitakda karung Setyembre Uno ang pagpabalik sa rehistro sa mga botante.
Sigon ni Atty. Francisco Pobe, regional director sa Commission on Elections kon Comelec-Caraga, ang maong voters registration posibleng tapuson sa Hunyo 2021 aron duna usab silay panahon nga mangandam alang sa nagkadool nga piniliay sa katapusan nga bulan sunod tuig. Kini ilabina nga gitakda ang filling sa mga kandidatura sa Oktubre 2021.
Sumala pa ni Atty.Pobe nga gihatagan sila og igong panahon sa pagpangandam tungod kay automated na ang election sa tibook nasud. Mamahimong abli ang mga munisipyo og siyudad nga election offices sa adlaw nga Martes ngadto sa Sabado sa alas 8:00 sa buntag ngadto sa alas 3:00 sa hapon.
Samtang ang provincial og regional nga mga opisina, mag-abli sa Lunes ngadto sa Biernes apan on call gihapon ang mga opisyal sa adlaw nga sabado ugaling gikinahanglan.
Samtang walay himoong sattelite registration sa mga kabarangayan hangtud nga anaa pa ang Covid-19. Sa mga bag-ong magparehistro gikinahanglan ang mga pamatood sa ilang edad nga 18-anyos pataas na sama sa birth certificate, School Record og ID.
Target karun sa buhatan nga maka-cater og 50 ka kliyente kada adlaw sukwahi kaniadto nga muabot sa 120 ka tawo kada adlaw sa pagsugod sa registration.
Gipahibalo usab ni Atty. Pobe ang mga kabag-ohan sa mahitabong voters registration isip pagsunod sa mga lakang aron malikayan ang pagkuyanap sa covid-19. Lakip na niini ang dili pag-cater sa mga kliyente nga wala naka-facemask og faceshield. Samtang gi-agni usab sa opisyal ang pagdala og kaugalingong ballpen apan kung dili makadala, duna usab silay ballpen nga ilang gina-sanitize matag karun og unya.
Dunay pwedeng ma-download usab nga porma apan kung dili maka-download dili lang maproblema tungod kay dunay porma usab sa ilang buhatan..
Gipadayag ni Atty. Francisco Pobe, regional director sa Commission on Elections kon Comelec-Caraga nga estrikto nilang ipatuman ang mga lakang aron malikayang makatakod ang Covid-19 dungan sa pagsunog sa voters registration sunod semana. Sigon sa opisyal sa pagsulod pa lang sa magparehistro, kuhaan na kini og temperature nga subling himoon paglabay sa 5 minutos.
Ugaling molapas sa 37.8 nga ka-initon sa lawas, manawag sila sa hingtungdang ahensiya nga maoy moasikaso sa maong indibidwal. Mo-fill-up usab kini sa Covid Virus Registration Form diin kuhaon ang mga personal nga impormasyon aron daling ma-trace ugaling dunay kakulian nga mahitabo ilabina sa hisgutanan sa virus.
Dinhe sa dakbayan sa Butuan diin dunay nagtunhay nga palisiya mahitungod sa quarantine pass, misuroy na ang ilang mga personahe ngadto sa mga LGU aron agnihon nga mag-siyu og travel pass sa mga residenteng gustong magpa-rehistro sa Comelec.
