BUTUAN CITY – Posibleng lugwayan pa sa lokal nga kagamhanan ning siyudad sa Butuan og hangtud sa 14 ka adlaw ang temporary total lockdown nga gipatuman sa may Salvador Calo Public Market kon mas nailang Langihan Public Market nga gisugdan kaganina.
Sa eksklusibong pakighnabi sa Bombo Radyo Butuan, gipadayag ni Michiko de Jesus, information officer sa Butuan City government nga mag-agad unya kini sa resulta sa contact tracing nga gisugdan na ngadto sa tanang mga stall owners ug mga vendors samtang naka-lockdown ang maong merkado sulod sa unom ka mga adlaw.
Sigon ni de Jesus, nadesisyunan ni Mayor Ronnie Vicente Lagnada ang temporaryong total lockdown aron mas mapahugtan ang contact tracing ug ang pagpa-ilalom sa rapid test sa tanang mga nag-ukupa sa merkado.
Tinguha sa kagamhanan nga masanta na ang pagtaas sa local transmission sulod sa merkado ilabina nga stall owner usab ang usa sa tulo ka mga nagpositibo sa COVID-19 kinsa namatay ning mi-aging mga adlaw.
Desisyunan pa usab kung apil ba sa ipasira ang mga establisamiento sa atbang nga bahin sa merkado ilabina kung masuta unya nga duna usa’y mga negosyante o kaha ilang mga trabahanteng positibo sa makamatay nga coronavirus.
Gidugang ni de Jesus, dili nila mabasol ang mga namaligya sa gawas apan gipanawagan niya sila na sundon ang kamanduan sa lokal nga kagamhanan tungod kay alang kini sa kaluwasan sa tanan.
Duna na matud pa’y listahan ang contact tracing team ning syudad ka-uban ang piniling mga personahe sa maong merkado aron matumbok gilayon ang mga angayang ipa-rapid test.
Alayon niini, nanawagan ang opisyal ngadto sa tanang taga-merkado nga mupa-ilalom sa contact tracing og dili mahadlok nga magpa-rapid test test aron paspas ang pagtumbok sa mga angayang ipa-ilalom sa swab test.
