BUTUAN CITY – Shock ang tanang tigpaminawan sa Bombo Radyo Butuan sa expose sa usa ka lumad nga taga-Remedios T. Romualdez kon RTR, Agusan del Norte kinsa atua na nagpuyo sa kauluhang Manila.
Sigon ni Marlon Fortun, dinhi na sa iyang pag-uli ug pagbalik sa Manila niya napamatud-an nga wala gisunod og sakto sa pipila ka mga front liners ang saktong health protocols nga gipatuman sa nasudnong kagamhanan.
Kini alang sa pagtumbok sa mga tawong mangabot agi sa Bancasi Airport ning siyudad tungod kay gihimo matud pang panapi sa mga in-charge sa maong tugpahanan ang rapid testing.
Sa eksklusibong pakighinabi ning sibyahan, direkta gikan sa Manila, gibutyag ni Fortun nga lig-on ang iyang gikuptang ebidensya uban sa lain pang mga pasaherong iyang nakasakay kalabot sa maong anomaliya.
Kini tungod matud pa sa natigayong ‘negative rapid test for sale’ nga ginahimo sa mga na-assign niini sulod mismo sa maong tugpahanan.
Saysay pa ni Fortun, bisan og asa nga laboratoryo pa sa tibuok Pilipinas pangitaon ang iyang blood sample nga maoy gamiton sa rapid test, wala’y makita niini tungod kay wala siya kuhai niini apan gihatagan og negative result bugti sa iyang gibayad nga 1,500-pesos.
Apil ang iyang nakasakay nga upat ka membro sa pamilya kinsa duna’y ka-ubang duha ka mga bata, napugos na lang matud pa pagbayad og 6-mil pesos aron lang makalarga na.
Gitawagan ning sibyahan ang kadumalahan sa Civil Aviation Authority of the Philippines kon CAAP-Butuan apan wala’y mutubag.
Hinuon bukas ang Bombo Radyo Butuan pagpaminaw sa iyang panig kalabot sa maong isyu.
