BUTUAN CITY – Malampusong gi-inagurahan kagahapong adlaw ang Molecular Laboratory ug COVID-19 Facilities sa may Butuan City Medical Center (BMC) nga gipangunahan ni Butuan City Mayor Ronnie Vicente Lagnada, uban sila Department of Health (DOH) Caraga Regional Director dr. Jose Llacuna, Jr., DOST Regional Director Dominga Mallonga, og City Councilor Cherry Mae Busa ang ribbon-cutting.
Sila Rev. Fr. John Christian Young ug Rev. Fr. Randy Jasper Odchigue ang nanguna sa blessing ceremony niini lakip na sa COVID-19 ward, ambulance, storage building, og opisina sa admin ug finance sa BMC.
Gipasalamatan ni Mayor Ronnie Vicente Lagnada ang DOH og DOST Caraga ug uban pang partner stakeholders sa ilang suporta sa pagriyalisar sa proyekto ilabina nga padayon ang pagsaka sa ihap sa mga kumpirmadong kaso sa rehiyon apan nagsugod pa lang matud pa kini rasong kinahanglan ang estriktong pag-obserba sa health protocols aron malikayan ang pagkuyanap sa virus.
Gilauman pa sa opisyal ang pagsaka pa sa confirmed cases sa musunod nga mga adlaw rasong angayan nga mas mag-amping ang tanan ug buhaton ang gipatumang mga guidelines.
Gibutyag ni Butuan City administrator Reynante Desiata sa eksklusibong pakighinabi sa Bombo Radyo Butuan, nga ang 50 bed capacity nga molecular laboratory la-umang mahimong operational sa unang semana sa Agosto.
Dakong tabang kini ilabina niadtong makasinati og severe o critical nga kondisyun tungod sa Covid-19.
Giklaro pa ni Desiata nga prayoridad nga dawatong pasyente niini ang taga-Butuan apan dili balibaran usab ugaling dunay emerhensiyang mu-abot.
Samtang gipaniguro usab ni City Councilor Cherry Mae Busa, chairman sa Committee on Health sa Sangguniang Panlungsod nga napailalom sa saktong training ang mga mu-man sa mga ekwepo sa maong laboratory sama sa tulo ka mga MedTecs nga gibansay pa sa Southern Philippines Medical Center (SPMC) sa Davao City.
Hitsas na sila sa pagserbisyo ugaling mahimo nang operational ang maong laboratoryo ug madungagan pa ang ilang ihap sa umaabot nga mga adlaw.
Giklaro usab sa konsehal nga ang 50 ka mga beds nga anaa sa BMC-main, i-cater lamang ang kadtong mga pasyente nga anaa sa severe o critical condition tungod sa COVID-19.
