BUTUAN CITY – Padayon karun ang imbestigasyon sa kapulisan sa lungsod sa Carmen, Agusan Del Norte may kalabutan sa shooting incident nga natigayon kaganinang alas 10:00 sa buntag sa may District Dagohoy, Barangay Poblacion diin mikalas sa kinabuhi sa biktimang habal-habal driver.
Sa pakighinabi sa Bombo Radyo Butuan kang Police Captain Jennefer Omiter, Hepe sa Carmen Municipal Police Station, giila niini ang biktima nga si John Rey Rabadan, 25-anyos, olitawo nga taga Kabayawa, Poblacion sakop sa maong lungsod.
Saysay pa sa hepe nga gikan nangompra ang biktima og panginahanglanon sa balay sama sa bugas kauban ang 3-anyos nga pag-omangkon sa dihang gipara sa mga suspetsado. Gipakanaog matud pa ang bata og gibilin sa dool nga panimalay adiser gipusil ang biktima sa makatulo ka higayon gamit ang punto 45 nga pistola.
Nahinabi usab sa kapulisan ang babaye nga maoy nabinlan sa bata diin gibutyag matud pa niini nga igo lang niya gidawat ang bata gikan sa mga naka-bonnet ang suspetsado adiser nadungog ang mga buto sa armas.
Padayon karun ang ilang manhunt operation batuk sa wala pa mailang mga suspetsado samtang daghang ang-gulo usab ang ilang gilantaw may kalabutan sa maong pagpamusil.
