BUTUAN CITY – Gipasakaan na og kasong large scale estafa sa pipila ka mga membrong na-ilad ang mga kadagkuan sa bag-ong sistema karon sa Kabus Padatoon kon KAPA Community Ministry International nga mao ang SDTCC.
Sa pakighinabi sa Bombo Radyo Butuan, gipadayag ni alyas Baby nga gawas sa Bombo Radyo miduol na sila sa mga hingtungdang ahensiya sa gobyerno aron magpatabang sa ingon ila pang makuha ang nabubo nilang dakong kwarta sa nasangpit nga investment scheme.
Dugang pa ni alyas Baby, laumang madugangan pa ang mga mupasaka og kaso batuk kanila Nelson Utbo, Daniel Canales,Samson ‘Biboy’ Amores ug sa uban pa ilabina kadtong mipasalig kanila atol sa orientation nga mabalik kanila og mas dako ang kantidad nga ilang gibubo apan hangtud karon daghan pa gihapon ang wala man lang makakuha sa ilang puhunan.
Gidugang pa ni alyas Baby nga duna pa sila’y pipila ka mga kaubanan nga naglaom sa saad nga dunay mu-abot nga blessing sanglit magpadala matod pa og kwarta dinhi sa Butuan ang ilang main office aron maoy ipang-apod-apod apan hangtod karon, wala pa’y mi-abot.
Taliwala niini naninguha gihapon kini nga mabalik bisan ang gi-capital man lang nga 550,000-pesos sa pakyas nga investment scheme karon sa KAPA nga SDTCC.
