BUTUAN CITY – Wala pa’y gipagawas nga pamahayag ang Police Regional Office kon PRO-13 kalabot sa hinungdan nganong naka-angkon og mga fatal injuries ang ilang police trainee nga miresulta sa kamatayon niini.
Kini human gikuhaan og pagpasabot sa Bombo Radyo Butuan, ang maong buhatan base na usab sa ilang post dihang gidu-aw ni Police Regional Office 13 Director Brigadier General Joselito Esquivel, Jr, ang haya ni Police Trainee (PT) James Polistico sa Purok 13, Brgy. Poblacion Sibagat, Agusan del Sur og mihatag sa suportang pinansiyal ngadto sa nagbangotan niining pamilya.
Nakalatid sa ilang Facebook post nga namatay si Police Trainee Polistico niadtong Disyembre 27, 2019, human na-diagnose ug gitambalan tungod sa na-angkong brain herniation, right hemisphere, ug acute subdural hematoma bihemisphere contusion.
Nasayrang mipa-ilalom si James Polistico sa unom ka bulan nga Public Safety Field Training Program kon PSFTP sa Regional Training Center, Brgy. Lipata, Surigao City.
Sa pagkutlo niini nga balita, nag-text ning sibyahan si PMajor Rennel Serrano – information officer sa PRO-13 nga nagpahibalong nagtagbo pa ang ilang mga tag-as nga opisyal subay sa maong hitabo.
