BUTUAN CITY – Gikatakdang iduso karong adlawa sa session sa Sangguniang Panglungsod ang resolusyong magmandu sa City Engineering Office, City Building Office ug sa City Disaster Risk Reduction and Management Office nga magpahigayon og structural integrity audit sa mga gitukod nga dakbalay kinse anyos na ang nakalabay ug labaw pa.
Sa eksklusibong pakighinabi sa Bombo Radyo Butuan, gipasabot ni Butuan City Councilor Vincent Rizal Rosario – chairman sa Committee on Infrastructure sa Sangguniang Panlungsod, tumong sa iyang idusong resolusyon nga masusi ang kasamtangang sitwasyon sa mga dakbalay nga gidesenyo base sa karaang edisyon sa National Structural Code sa nasud.
Kinahanglan matud pa kining makita sa mga local engineers aron makasugyot kung duna ba’y angay usbon sa masusi nilang dakbalay aron mas mulig-on kini og luwas ilabina panahon nga mu-igo ang kusog nga linog.
Gawas niini, gihingusgan usab sa konsehal ang paghatag og giya sa probisyon sa National Structural Code sa nasud.
Gipasabot niining kinahanglan duna’y ibutang nga seismic instrumentation room sa mga dagkong pribado og pampublikong dakbalay sa syudad aron masayran ang epekto higayong duna’y kusog nga linog ilabina nga makatabang usab ang impormasyon niini ngadto sa Phivolcs ilabina nga sunod-sunod ang linog nga linog nga mi-igo karon pulo sa Mindanao
