BUTUAN CITY – Padayon pa ang imbestigasyon sa kapulisan sa lungsod sa Nasipit, Agusan del Norte human ang usa na usab ka insidente sa pagpamusil-patay sa usa ka ginang nga binuhatan sa upat ka wala pa mailang armadong mga lalaki, halos usa ka semana lang human ang parehong insidente.
Gi-ila ni Police Staff Sgt. Elmer Jaranay ang biktimang si Lilian Catingog, 44-anyos, residente sa Sitio Macasihi, Brgy. Camagong sa maong lungsod.
Sa eksklusibong interview sa Bombo Radyo Butuan, gipadayag ni PSS Jaranay nga base sa pamahayag sa bana sa biktima, pasado alas-8:05 kagabii dihang agisulod sa upat ka mga lalaking naka-helmet ang ilang panimalay.
Duha matud pa sa mga suspek ang nagkupot sa mga lalaki ug ang laing duha maoya midiretso sa kusina ug didto gipusil ang biktimang naghugas lang sa ilang kinan-ang plato samtang dali gilayong misibat ang mga suspek sakay sa duha ka motorsiklo.
Gipakisayran pa sa kapulisan ang identity sa mga suspek ug ang posibleng motibo sa kremin.
Mahinumdumang ning mi-aging mga adlaw lang dihang unang gipusil-patay sa wala pa mailang mga responsable ang silingan sa biktimang si Anita Salinsing.
